وزير السكنى.. حفل الاستقبال فالكاريان
«بيزوطاج» لوزير السكنى الجْديد، ينظمو ليه «حفل الاستقبال»، فشي كاريان صفيحي، مفركع فيه الواد الحار، وشابكة فيه «تخرميز» وعشوائية، ويكون قريب لشي مجموعة ديال السكن الاقتصادي، عماراتها طالعين بالسيما لمسّوسة، والياجور ديال الثمنية، ما عندهم صبيطار، لا مدرسة، لا مساحات خضراء لا هم يحزنون، وكيطل على المدينة لقديمة، وديورها الآيلة للسقوط، كتبان من لبعيد بحال «برج بيزا المائل» ديال الطاليان. باش سعادة الوزير، يعرف راسو مزيان فين غادي يحط رجليه، وميبداش علينا عوتاني بنفس «الكاسيطات» اللي كيسربي لينا فيها أي وزير جديد، «حكّا والواد أنا باقي عاد جيت، ما عارفش القطاع مزيان، عاد غادي نشوف، وغادي نلونصي واحد الدراسة، وغنديرو إحصاء للساكنة»، وَا تّا لا آخويا، «حفل الاستقبال» ها نتا شفتي كلشي فيه، آدْخل معنا ديركت للعرض، وْخطينا من داكشي ديال المقدمات الطللية، راه طلعات لينا فالراس. و«اللي دارو ليه البيزوطاج للدراسات ما يحتاج».
