أنا نيت عزيز عليا أي حاجة عندها علاقة بالبابورات والمْرَاسي وْلحرّاكة ديال اللانشات.. فالصراحة كون غير شاف ليا معاه السي الرباح شي كريمة ديال بابور باش يعود يطيح عليا الإلهام ديال الشعر وسط لمّاج ديال البحر
فالصراحة عندهم الزهر دوك الشعراء ديال المعلقات السبع الطوال حيت ما عشتش فالعصر ديالهم، أما كون قضيت عليهم واحد واحد، ما نخلي على عنترة بن شداد ولا «عمرو بن كلثوم» ولا حتى «أم كلثوم براسها»
هانتوما باش تعرفوني فنان واعر شوفو على كيتارة عندي، هادي را منها بيانو منها كمبري.. وْتا يلا غرق بينا البابور نقدر كاع نركب فوقها ولا نجدف بيها.. اثنين في واحد «موسيقى وْصوفيطاج»
وْمْع تأثرت بزاف بالفيلم كلت لمولات لبيل، وااالو ما نايضش ليكم من هاد السينما تا نكتب قصيدة على هاد الفيلم التاريخي الواعر
داك النهار عركتها موناضا فواحد الباطو ديال مالين السردين، هانتوما شوفو على صورة فنية وبلاغية طاحت عليا «واحد عندو باسبور معمر بالفيزات مدايرهم ديكور هادي داخلة وهادي خرجات وأنايا غير ندور كل ليلة فين نبات هايم من بور لبور».. الله الله يا سلام على إبداع كنبدع ليكم.. انا را خاصكم تديرو ليا تمثال حدا «المانيرة» ديال البحر
