جري عليا نجري عليك

خالد الشرادي

مفهمتش انا الفقراء ديال المغرب دخلو سدو عليهم، وكيخرجو مساكن غا مرة مرة يلعبو كاش كاش مع القوات المساعدة على جوج كيلو ديال بطاطا ودرهم ديال الشعرية! بينما الأغنياء لي عمرو مزيان الفريكو بسطيك والفوفيلي وصطوكاو الكاراج بالهاينيكن والما ديال الخاريج والبابيي طواليط والطاكلياتيل! وبعدما فرتكو الأسواق الممتازة من السلعة وجعلو رفوفها لهطة لمن لا يعتبر! وبعدما رجعو للديور واضطجعوا على جنوبهم، دازو يشوفو مع صندوق كورونا كيفاش يفرتكوه من الفلوس تاهو، الغريب ان كاع هادوك لي كيمشيو للخدمة بالكاطكاط ناضو كيطالبو الدولة تكتب ليهم حقهم من الورث ديال الحاجة كورونا! المدارس الخاصة لي اختصاصية فالحليب ديال أولياء الأمور، باغية دابا تحلب كورونا.. موالين المصحات الخاصة لي اختياصيين في الجزارة ديال المواطنين تاهوما باغين يطيرو شي فخذ من صندوق كورونا.. مهن عديدة ومقاولات اكثر، مزال حتى مدخلنا فالأزمة، بلاصت ما يطيحو عليهم أفكار واعرة ونموذجية، طاحو ليهم غا الريوك على الدعم وموراها وطايحين علينا بالبكا وطلب فالموعاونة..

فقط المزاليط مساكن هوما لي ما لقاو لمن يطلبو وهوما ينوضو للسطوحة يطلبو من سيدي ربي يجمع علينا هاد كورونا بعدما شافو الطاليان بالمافيا ديالها ومعقلش عليها الفيروس!

الخلاصة هو أن مصيبتنا فهاد البلاد هي الجشع.. وان الناس لي كضرب الأموال وكتشفط الضرائب، وكتخرج الفلوس باش تدوز العطل فجزر الكوباكبنطاطانا.. من خيرات الشعب الكحيان،هي لي كتحرافلينا معاها نهار كتجي الأزمة وكتوقف لبلاد على شهامة المواطنين المستفيدين.. وفللخر كيخليونا لينا “vu”وكيدخلو للفيلات ديالهم يستهلكو السطوك ديال” الفان بلون “قدام لابيسين! في حين المزاليط لي ممستافدين تا زفتة وماعندهم لا خدمة لا صالير مزيان لا صحة مزيانة وعايشين غا “بالحريرة” في جميع مستوياتها الاجتماعية.. فاش كتوقف عليهم.. كتلقاهم موجودين واخا دير بيهم غير حظر التجول وتخرج مرة مرة تجري عليهم فالشارع على الاقل بعدا يلا مستفدتي والو دير معاهم غا الرياضة وعلاشلا مع هاد قوة جري عليا نجري عليك نكتاشفو شي عداء واعر في صفوف لقوات المساعدة نقدو نربحو بيه نشاء الله شي ميدالية فالألعاب الأولمبية المقبلة لي مبقاوش غيديروها بناقص !

#عطيوني_السبرديلة ديالي_نحطم الرقم ديال المقدم فالألف وخمسمية متر مكعب