الحنش فالسروال
هاد ليام كثرو المحللين والمتخصصين فالشؤون المالية، لدرجة وليتي كاتفتح الفيسبوك كاتسمع غي “تعالى تفهم تعويم الدرهم”، “أسرار تعويم الدرهم في خمس دقائق”، “أجي تعرف كلشي على تعويم الدرهم”، والمصيبة أن المغربي البسيط مسكين مالاقيش الدرهم حتى يشوفو بقا ليه عاد يعومو.
ولكن وبما أن الموضوع صبح قضية رأي عام من الضروري حتى حنا نديرو شي بركة فهاد الموضوع، وهاد المرة بالدارجة تاعرابت، باش كلشي يفهم وحتى واحد ما يجي غدا يكول لينا مكانتش فراسي.
وعطيني ودنك وسمع مزيان.
هاد الموضوع ديال تعويم العملة ماشي جديد، وسبقنا ليه الاتحاد الأوربي وكانو سماوها ديك الساعة استراتيجية الحنش فالنفق.
حنا فالمغرب حيت كلشي عندنا كايوقع فجأة نقدرو نطلقو على هاد الخطوة ديال التعويم استراتيجية “الحنش فالسروال”، بمعنى بنادم تركب فيه الخلعة وتخليه واقف فبلاصتو ما يقدر لا يتحرك لا يبرك، غادي يبقا واقف فبلاصتو قاطع النفس خايف لا يتحرك يقرصو الحنش، وهوا را شي حنش مكاين.
والحكاية ديال تعويم الدرهم ماشي قرار جا غي بوحدو، ولكن را سبقاتو قرارات أخرى بدات مع عمو بنكيران.
وهادو اللي نادمين على ذهاب بنكيران وفارعين الوقت بالبكا والنديب عليه، خصهم يفهمو أن بنكيران كل ما دار هو أنه طبق تعليمات صندوق النقد والبنك الدولي بالحرف، ولأن هاد جوج بنكات دايرين بحال هاجوج وماجوج وما معاهومش اللعب وكايسلفو البلدان اللي ما فحالهومش بحال المغرب بالمتيريس باش يردو فلوسهم بالمثني والمثلث، شرطو على بنكيران يعمل شي حويجات، وعملهم الصاط مزيان، والمصيبة أنه قدمهم للشعب المخدوع على أساس أنها منجزات باهرة، والكارثة العظمى هيا أن الناس تاقو بيه، تكول موكلهم خرشاشة.
أول أمر نفدو بنكيران هوا أنه حيد الدعم على المحروقات، ووجد لخوه العثماني باش يتحيد الدعم على البوطا والطحين والسكر قريبا، وشجع الخوصصة فالتعليم والصحة وساهم فقتل المدرسة والصحة العمومية، ولابد أنكم باقين كاتعقلو نهار جا وكال بلا حشمة بلا حيا أن الدولة ماعندهاش الإمكانيات باش تقري وداوي المغاربة فابور، ولابد باقين عاقلين نهار هاداك الكارثة ديال الداودي كال للمغاربة حتى هوا بلا حشمة بلا حيا اللي بغا يقري ولادو يضرب يدو لجيبو، ما لقاش اللي يجمع معاه بشي تمرميقة باش يسد هاداك الفم عندو اللي غا حالو.
لأنه لاش صالحة الدولة إلى ما ضمناتش الحد الأدنى للمواطنين من الصحة والتعليم والخدمات العمومية، واش الدولة مديورة تجمع غي الضرائب ؟
الأمر الثاني اللي طبقو بنكيران هوا أنه زاد فسن التقاعد باش بنادم بوه يبقا خدام وما يتقاعد حتى يقرب يموت باش عمرو ما يستافد من فليساتو ديال التقاعد اللي تجمعو ليه.
ثالثا ها السي العثماني عوم الدرهم، وخدا القرار ليلة الجمعة باش يدوز بحال جغيمة ديال الما مع الويكاند ويصبح الدرهم نهار الاثنين عايم وماشط ولابس حوايجو وداخل للمدرسة مع بقية الدوفيزات.
هاد العومة ديال الزربة اللي دار السي العثماني دابا كان غادي يديرها السي الجواهري والي بنك المغرب ف30 يونيو اللي الفايت، اللي وقع هوا أن السي الجواهري جمع مالين البانكات ووقفهم مورا الخط وعلمهم ما يدخلو للسباق نحو تعويم الدرهم حتى يعطيهم الإشارة، أرانا شي بانكات ماليها حاسبين فروسهم مقوسة وقافزين، غي وقفو فالخط وهوما يضيماريو كاطريام وبداو يتقضاو فالعملة ويخزنو فيها، حتى كانو غادي يديرو أزمة صرف فالبلاد.
ناض السي الجواهري كال ليهم يا رباعة الغدارة علاش طعنتوني فظهري وفشلتو ليا التعويمة ديال الدري، عفوا ديال الدرهم.
ناضو شي وحدين من أتباع الوزير الفعفاع دارو حملة على الجواهري وروجو أن الفعفاع غادي يشد بلاصتو على رأس بنك المغرب، الساعة الجواهري واخا داخل فثمانين عام صدق عظم نيت، ومشا لميريكان جاب جائزة أفضل محافظ بنك مركزي فالعالم، وهكذا حافظ سعادة المحافظ على منصبه ورجع الفعفاع طاوي لعلام لسبانيا فين مشا يدوز التقاعود المريح ديالو.
ومن تماك وهوما فالحكومة وبنك المغرب سامرين، حتى لدابا ملي جطو فرش ليا الميزانية ديال 2016 اللي دارو فيها تيبيخا وخلطو الأرقام شي مع شي باش يديرو للمؤسسات المالية الدولية نوض أو نوض اللي موالفين يديرو لينا حنا، عاد حصلو وشدهم البنك الدولي وصندوق النقد الدولي من النغانغ، وكال ليهم يا تعومو دراهمكم باش نقدر ناخد رزقي يا عمركم لا باقي شفتو شي فرانك من عندي.
المشكلة أن هاد الإجراءات كاملة الهدف الوحيد منها هو توفير الفلوس ديال الخلاص ديال الكريدي، اللي عِوَض ما نديرو بيه الاستثمار ونخدمو الشباب ونخلقو الثروة خلصنا بشوية منو المانضات ديال الموظفين واللي بقا علم الله فين مشا.
وهاد الكريدي ما معاهش الملاغة، إلى ما خلصناش بخاطرنا غادي نخلصوه بزز، وهاد بزز هي إمكانية فرض التقويم الهيكلي على المغرب كيما سبق وقع لينا فالثمانينات وما خرجنا منو حتى غفر لينا الله الذنوب.
شنو هو التقويم الهيكلي ؟ المسألة بسيطة، هوا الاستعمار، غير هوا استعمار بلا طيارات ولا جيوش وإنما فقط بقرارات مؤلمة دايرة بحال شي روصيطة ديال الدوا بمذاق الحنظل خصك طاصيلتك تاخدو باش تبقا حي وما تجيكش السكتة القلبية، هاديك اللي كان المرحوم الحسن الثاني هضر عليها فواحد الخطاب.
لهاد السبب قررو يعومو الدرهم، حيت المغرب كايخسر العملة الصعبة كاملة اللي كايجمع من هادوك جوج قيوش ديال التوريست اللي باقين كايطلو علينا ومن هاديك البركة اللي كايرسلو عمالنا في الخارج فالشرا ديال السلع من الخاريج.
ولينا كانشريو كلشي من برا، بقا لينا في الكيس ديال الحمام حتى هوا يجينا من تركيا.
والهدف من التعويم هوا السلعة اللي كاتشرا من الخارج تطلع فالثمان، وبالتالي ماليها غادين يطلعو الثمن على المستهلك اللي مضروب على سلعة الخاريج، وهاداك المستهلك غادي يتدعر وغادي يتقهر بالغلا وغادي يعود يشري السلعة ديال بلادو، بلهلا يطريه ليه، وديك الساعة غادي يهبط الاستيراد وغادي يتقاد الميزان التجاري وغادي يبقا طرف ديال العملة الصعبة فالبلاد.
ولمعلوماتكم فمشكل عجز المبادلات التجارية وصل 127 بليون درهم، شي 13.4 بليون دولار، بزيادة نسبتها 4 في المئة عن قيمتو قبل عام.
وتجارة المغرب الخارجية كلها تقدر بـ442 بليون درهم، منها 285 بليون من الواردات و157 بليون من الصادرات فقط.
وطبعا هاد الوضع الخطير مكانش ممكن يستمر، وبداو يطبقو إجراءات عملية، منها رفع الرسوم الجمركية على حوايج تركيا اللي العدالة والتنمية طلات بيهم البلاد، وتسلفو من البنك الدولي 200 مليون دولار باش يطورو قطاع للصناعات الغذائية، باش بنادم يبدا شوية ياكل داك الشي اللي كايصاوب فبلادو ماشي داك الشي اللي كايجيه من برا.
ومن بعد هاد الشي كامل شدو الدرهم مسكين ولبسوه كيلوط وكالو ليه تلاح عوم بحرك.
حنا والله أعلم كانكولو غادي يزطط راسو وغادي يقدر يحافظ على راسو خارج الما، ولكن إلى جاب الله وبقبقها راكم معلومين، لا تكولو مكناش عارفين.
