الحمداوية: نلبس «الميني» ونشطح مع شاكيرا وأم كلثوم إذا خرجات من القبر خاص غير «الكاشي» يكون مزيان
حاورتها: بشرى الضوو
الحاجة الحمداوية، الفنانة اللي ماكنشبعوش منها.. آش خبارك؟
الحمد لله آبنتي هاذ الساعة الحمد لله.
تبارك الله والصلاة على النبي عليك، دايما متألقة.. بطول العمر ليك يا ربي آمين..
باراك الله فيك أللا.. الله يخلي ليك صحيحتك.. شكون أنت؟
أنا منتجة.. بغيت نسولك آ الحاجة واش كتعرفي جينفير لوبيز؟
لوطيل؟
لا جينيفير لوبيز.. المغنية الأمريكية؟
لا.. ما عرفتهاش.
المغنية اللي غنات في «دوزيم» عريانة؟
لا..لا.. مانعرفهاش.. حيث كانت بنتي عندي عيانة ماكنشوف لا تلفزيون لاوالو.. أنا عندها دابا في دارها.
واخا ماشي مشكل.. كتعرفي شاكيرا؟
آييه كنعرفها.. مغنية ياك؟
آييه مغنية.. معروفة في العالم.
آييه مزيان.
حنا كنفكرو باش تديري واحد «دويتو» مع شاكيرا كيفما درتيه مع حميد بوشناق.
بحال أغنية «الكاس حلو»؟
تقريبا بحالها..
عرفتي هاذيك الأغنية راه كانت ديال الحسين السلاوي.. عرفتي آش كان كيقول هو؟.. كان كيقول «ها الكاس حلو.. السّْكرة والتعربيطة مع السي لحلو..» أنا بدلتها بالشيبة والنعناع وبالعنبر .. كان كيضحك بيها الله يرحمو مسكين.. كنت صغيورة وأنا كنتفرج فيه بكري.
ولكن آ الحاجة.. خاصك أنت تغني بالعربية فهاذ «الدويتو» وهي بالإنجليزية وتلبسي «الميني» كيفما لبستي في المجلة.
آييه ماكاين حتى شي مشكل نلبس «الميني».. ولكن كاين شي «كاشي» مزيان ولا لا؟.. خاصني الكاشي (مقابل مادي).
طبعا.. طبعا.. شحال كتطلبي؟
إيوا خاصهوم يقولو ليا شحال.. نغني حتى مع أم كلثوم إذا خرجات من القبر.. خاص غير الكاشي يكون مزيان.. كيفما كاندير مع التلفزيون كيعيطو ليا كيقولو ليا تاخذي قدا وقدا.
مايكون غير خاطرك آ الحاجة.. ولكن بشرط تلبسي «الميني» كيفما تصورتي في المجلة وتشطحي بحال شطيح شاكيرا.
آييه ولكن هاذ التصوير بغينا نعرفو واش كيتباع ولا في السيدي؟.. ولا آشنو؟.. خاصني نعرف.. حيث عندي المانادجير ديالي وعندي اللي مكلف بيا.
هذا فيديو كليب غادي تغني فيه مع «شاكيرا» وغادي يتصور وغادي يشوفو العالم كامل.
مزيان.. هاذ شاكيرا غادي تغني بالكاورية؟ (بتثليت الكاف).
آييه غادي تغني بالإنجليزية؟
(ضاحكة) You speak English tank You very Much
تبارك الله عليك كتدوي أحسن مني بالإنجليزية؟
«Ah oui» مالي آنا خليت شي بلاد مامشيتش ليها؟ !!.. ما خليت كندا، نيويورك، ستوكهولم، الدانمارك.. وايلي وايلي آبنيتي !!.. أنا راه مغنية ديال الفداء وديال محمد الخامس وديال الحسن الثاني ومحمد السادس ديالهوم كلهوم.
ماعندكش مشكل تلبسي «ميني» بحال اللي درتي في المجلة آ الحاجة؟
ماعنديش مشكل.. ولكن ماعنديش «الميني» في الدار.. هاذوك لحوايج عطاوهوم ليا وقالو ليا لبسي درت بيهم الإشهار ورجعتهوم ليهوم.
لا.. حنا نلبسوك باش تديري فيديو كليب مع شاكيرا، المهم خاصك تلبسي العصري و«الميني»؟
ماشي مشكل.. نلبس «الميني» خاص غير «الكاشي» يكون مزيان.
غادي يعجبك الحال.. كوني هانية.
إيوا هاكداك راه ماشي التلفزيون هذا.. دابا راكوم غادي تلبسوني رومي وداكشي قصير.. دابا إذا شافوني كلشي غادي يلبس رومي.. شارفة بحالي.. ماشي بحالكوم نتوما باقيين شادين.. الله بعدا يبغيني حيث الناس كيقولو ليا كتفرحي لينا العباد ديالو.
بصراحة كتفرحينا بزاف وغادي تزيدي تفرحينا إذا بديتي تشطحي مع شاكيرا ولابسة «الميني».
إيوا عطيني التلفون ديالك.. غادي تقيدو بنتي.. بلاتي تجيب ستيلو من البيت لاخر.. صبري عليا من هنا يومين أنا نعيط ليك في التلفون.
تمرر ابنتها للصحافية عبر الهاتف فتمنحها الرقم الذي تجري منه «مقلب تلفون كاشي» ثم تسألها الصحافية.. ياك ماعندكش مشكل الواليدة تغني وتشطح مع شاكيرا وتلبس «ميني»؟.. فترد قائلة:
واخا خاصها حتى تهضر مع المانادجير ديالها.
تمرر الابنة سماعة الهاتف للحاجة الحمداوية، ثم تقول: شوفي راه غادي نعيط ليك نهار الاثنين ولا نهار الثلاثاء.
إيوا عطينا الموافقة من دابا علاش نتسناوك حتى لنهار الثلاثاء.. ياك المشكل كاين غير «في الكاشي».
آييه.. أنا غادي نعيط ليك ونقول ليك الثمن.
ولكن خاصك تعرفي آ الحاجة هاذ شاكيرا راها معروفة عالميا ما خاصكش تطلبي بزاف ديال لفلوس.. انت اللي غادي تستافدي من هاذ «الدويتو».
(غاضبة): وعرفتي بعدا معامن كتدوي؟.. أنا راني أكبر نجمة ديال المغرب.. عرفتي شكون اللي كيقولها؟.. النصارى كيقولوها.. في أمريكا كيقولو (ouuuuuh hajja very good)، زعما مزيانة كتغني مزيان.. والفرانساويين كيسميوني «إيديت بياف» ديال المغرب.. يا الله بنيتي غدا إن شاء الله نعيط ليك. (ثم تقفل الخط).
تعيد الصحافية الاتصال بها لتكشف لها المقلب.
رد فعلها لدى اكتشافها المقلب
«ويلي.. ويلي.. كنحساب غادي نغني بالصح مع شاكيرا».
