أكف الضراعة

شرادي
كاين مدن فالمغرب مافيها تا حاجة من غير القهاوي، كتخرج كتلقا قهوة قدامها جوج قهاوي، جاو وسط واحد طناشر قهوة، وقدامهم كتلقا شواية ديال الكفتة والدجاج تاهي فيها قهوة لداخل كتسربي البرارد ديال أتاي! كتزيد شوية كتلقا الحمام ديال النسا وحمام ديال الرجال، تاهو كيجيب أتاي من داك القهوة لي قدامو.. لا معامل ولا مصانع ولا مقاولات ولا مشاريع صغرى ولا متوسطة ولا مال ولا حياة ولا أوراش من غير شي ورش ديال شي «مصرية» فالسطح يلاه طالعة بلا رخصة! هادشي كامل وطبعا بسبب حالة «الطوارق الصبغية» كل هاد القهاوي والشوايات كانو فيهم ناس خدامين على عائلات كاملة، وقليل فيهم لي شد شي دعم على هزالته، بسبب أن أغلبهم لا يتوفر على أي وثائق مهنية أو ضمان اجتماعي.. كيف يعيش هؤلاء اليوم وكيف يطعمون أبناءهم وكيف يعيلون أسرهم وكيف يصمدون كل هذا الوقت، دون أن يمدوا أيديهم بالسؤال!؟ الله وحده وسبحانه وتعالى يعلم والسلام وآخر دعوانا وإنما الأمم الأخلاق ما بقيت!
وإذا مشيتي سولتي السيد رئيس الحكومة غفر الله لنا وله ولمن صوت عليه وعلينا إلى يوم الدين! غيضرب عليك واحد التفرنيسة بيجيدية ديال المؤمنين الذين ماصدقوا ما عاهدوا الناخبين عليه، فمنهم من ضرب التقاعد الاستثنائي ومنهم من ينتظر وماشي مشكيييل ديالنا فديالنا، وغيشوف فيك بدوك النظاظر ديال صفحة الوفيات! وغيقولك بسملاه الرحمان الرحيم، لقد قامت الحكومة وحسب تطور الحالة الوبائية بإعداد تصور لخطة عمل محددة تقوم على استشعار الخطر، الذي، ولولا الألطاف الإلهية، لكان المغرب اليوم لا قدر الله ضمن دائرة الدول التي ما فتئت وما كانت وحسبما وإذا سمو عليه ولربتما فاض المَحيا ببحار الموج من اللجج.. والسلام عليكم ورحمة الله تعالى وبركاته وآجركم الله إنه هو المُعطي المجيب!
وفاللخر، وبعد هاد التدخل.. وفاش تكون خارج تنتحر من شدة الفرحة، غتلقا الورقة ديال الضو فيها ثمنميات درهم ديال الرميد، متنساش تاخدها معاك وأنت ترفع أكف الضراعة للباري عز وجل، أن يجعل بلدنا آمنا مطمئنا من شدة الفقر!
#عطيوني_أكف_الضراعة_ديالي نرفعها بالضمة الظاهرة في آخر المطاف والسلام