فاطمة وشاي: «المُوسَاد» نفسُه لا يعرف أين أسكن وجميع «الشمكارة» مثقفون

حاورتها: بشرى الضوو

وافين آ الساطة؟!
(ضاحكة): إيوا هانا آ الساطة.
آنا ساطة؟!
(ضاحكة): إذا كنت أنت ساطة راه حتى أنا ساطة.. بياسة أنت قرطاسة؟
شمكارة مع راسك!!
كاع اللهجات كنعرفهوم.. (ثم تضحك بقوة).
كتضحكي حيث معمرا جيوبك.. المسلسلات والأفلام اللي مشاركة فيهم عطاهوم الله.
صافي صورت مسلسل واحد عمرت جيوبي.. جيوبي راهوم مثقوبين.
عرفتيني غادي نطلبك داكشي علاش كتقولي عليهوم مثقوبين؟
طلبي الله علاش غادي تطلبيني آنا..؟ (ثم تستمر في الضحك). شكون معاي؟
انت اللي جات معاك الضحكة.. الضحك راه فينا.
لا مافيكش الضحك حاشا.
قالو ليا كتديري الخير؟!
مرحبا.
أنا أللا فاطمة ضحك عليا واحد السيد وأنا حاملة منو دابا.
إذا ضحك عليك ضحكي عليه.
بصراحة ما عرفتش واش أنا حاملة منو ولا من واحد آخر؟
(تستمر في الضحك): إيوا انت اللي ضاحكة عليهوم بزوج دابا.. هذاك الجنين حتى هو مسكين ضحكتو عليه.. هذاك هو الضحك ديال بالصح.
هاذ الجنين مستقبلو بين يديك انت..
لا..لا.. مستقبلو بين يدي الله سبحانه وتعالى اللي خلقني وخلقو وخلقك.
الله يرحم بيها الوالدين بغيت نجي نسكن معاك غير فهاذ رمضان؟
(ترد بسخرية): تسكني معاي؟.. وأنت حاملة؟.. مرحبا.. شحال عندك دابا من شهر؟
غادي نولد في رمضان.
(تنفجر من الضحك ثم تقول): آش غادي نسميو هاذ الدري بعدا أو الدرية؟ بعدا واش ولد ولا بنت؟
العالم الله أنا حبلت عمري مامشيت عند الطبيب..
(تكتفي بالضحك).
كتضحكي عليا وانت عندك البنات؟.. أنا مللي ماكنكونش حاملة عطا الله في نمشي.. آش منك يا فيلات ويا ديور.. ولكن دابا حتى راجل ما كيقبل عليا؟
علاه شحال مرة حملتي أنت؟
بلا عدد.. بلا حساب !!
إيوا زاد الله في التيغراد.. زاد لينا في الخير ديال المواطنين غير من عندك أنت.
الله يرحم بيها الوالدين قبلي عليا غير نولد عندك في دارك.. الله يعطيك صحيحتك.
(تستمر في الضحك).
أنت ساكنة في الألفة حدا المحطة الأخيرة ديال الطوبيس 35، ياك؟
آي هاي هاي هاي.. «الموساد» ما عارفنيش فين ساكنة.
عندك الدراري ولعزارى؟
عندي زوج واحد بوكوص واحد شوية.
إذا ما قبلتيش نجي نولد عندك غادي نقول ليهم ولدك هو اللي حملني.
مرحبا هاذي نديرها معاك.. ولدي خاصو غير معامن.. مايضرب كاع تمارة هو باغي امراة واجدة وحاملة كاع ما يتعذب هو.. حيث أنا ولدي ماعنديش فين غادي يحملها اللهم تجي حاملة.. حيث بيت النعاس ديالي وبيت النعاس ديال الدريات وهو مسكين دايرة ليه واحد بيت النعاس حتى هو.. إذا جيتي غادي نخرج من بيت النعاس ديالي.. وغادي نديرو لعدول باش نشيعو الزواج.
واش داوية بالصح راه كنتيق؟
كنهضر معاك د بالصح.. مالنا حنا نخليو الدراري يتلاحو في الشارع؟
إذن هذا وعد تقطعينه على نفسك.. واخا شمكارة راني مثقفة؟
الشمكارة كلهم مثقين.. لأنه مثقفاهوم الحياة ومثقفهوم المجتمع.. الثقافة ماشي هي لقراية والفيسبوك وتويتر.
عندك الحق أللا فاطمة كون تعرفي وما داز عليا من مشاكل؟
مالك آخيتي حنينتي؟!
المهم أنا غادي نولد عندك.. مت أو حييت راه ولدي ولا بنتي أمانة في عنقك.
(ضاحكة): عنقي راه فيه بزاف ديال العقيق.
نحيدهوم ليك!!
تحيديهوم ليا وتحطي ليا الدريري الله يرضي عليك.. أنا واحلة مع قوم هنا.. كنقول يا ربي يتزوجو ليا هاذ البنات.. دابا راني فرحت قلت ليا حاملة قلت ليك آجي مرحبا. واجدة ما يتعذب ما يتوحم.
أنا ناخذ الطوبيس ونجي عندك.. إذا نكرتيني غادي ندير ليك فضيحة.
لالا.. أنا غادية ندير ليك شي فضيحة.. باينة عليك من الصويت ديالك بياسة نيت وقرطاسة.. ولدي قال ليا ماما ما فيا ما يتزوج ونشوف المرا عاد كتحمل.. مزيان يلقى مرا واجدة بحالك.
شوفي راه ما غاديش نجي بوحدي غادي نجيب معاي الواليد.. بابات الولد؟
إيوا شنو دابا باباه حتى هو غادي نتزوجو بيه ولا شنو؟.. غادي يشهد علينا هذاك الإله ياكوش ديال هاذيك العلمانية ما بغيتش نذكر سميتها..
عرفتك على من كتدوي هاذيك مليكة مزان.. السيدة اللي كتعايريها ظفارها بعشرة منك؟
بالصح.. بالصح.. أنا ماعايرتهاش.
هذاك الإله ياكوش بزاف عليك.. كون تشوفيه آش غادي يدير ليك إذا غضب منك.
هاذ ياكوش أنا ماعرفتوش أنا.. واش شي ياكوش نيت؟.. غادي تسنيو هاذيك الوثيقة ديال ياكوش أنت وولدي؟..
إيوا تسنايني هانا جاية ونشوفو آش غادي نسينيو!!
(تردد مقطعا من الأغنية الشعبية المعروفة) «تسنايني نهار الأحد راني كونجي.. تسنايني..» (ثم تقفل الخط).

رد فعلها لدى اكتشافها المقلب
تضحك قائلة: «بعض الناس يتصلون هكذا عبر الهاتف باش يتفلاو لابد تقرقبي معاهم الناب».