«بيزوطاج» لوزير الصحة.. يديرو ليه «البيرو» فشي صبيطار نائي

أحسن «بيزوطاج» ممكن يستقبلو بيه «وزير الصحة الجْديد» اللي غيخلف الوزير الحالي «أنس الدكالي»، هو ينقلو ليه «البيرو» الفخم ديالو، من مقر الوزارة لشي صبيطار نائي، فشي جبل مقطوع، مواصلاهش الشمش، ومكتوْصلوش «لابيلانص»، ومقطوع فيه الضو، وما فيهش التجهيزات، والطبيب كيْجي مرة فعشر سنين، وحتى الويفي مكاينش. أما في ما يخص حفل تسليم السلط «الباساسيون»، يديروه معاه، فصبيطار «ميريزكو» نهار الثنين فالصباح، وْسط قاعة الانتظار ديال المستعجلات، باش يتفرج ويشوف على خاطرو، السلاسة والانسيابية ديال العمل، وكيفاش المرتفقين شادين الصف والأطباء موجودين والصكانير خدام، والراديو كيطير ومبرونشي مْع الساتيليت تبارك الله. هاد البيزوطاج ممكن يخلي وزير الصحة الجْديد، يدير بناقص كاع، ويجمع حوايجو النهار اللول ويمشي بحالو، وْها واحد الصالير نقصناه علينا، أو ممكن فأقل الاحوال يباشر المهام ديالو بأقل قدر من التصريحات «الغوزية» والبلاغات الأفلاطونية، ويخرج من «البيرو الكليماتيزي» باش يشوف الصبيطارات «البعيداتيزي» والمستشفيات «المزاحماتيزي»، والتجهيزات اللي «مكيناشيزي». إيييه نعاماس.